珏霖仔八個月大喇!!

今日係仔仔豬8個月大嘅日子呢~~~ 真係大得好快呢~~~ 等我寫下佢而家嘅成長進度先!!!

(1) 仔仔6個幾月大開始識坐, 而家坐得好好!!! 仍然無牙仔, 不過就乜都放入口, 吽牙都吽左好耐喇, 仲未吽到!!!! 最鐘意咬玩具!!

(2) 床仔今個月我地終於整低左, 放仔仔落去佢會好努力想企起身!!! 不過次次都會跌同埋好易撞親!!! 所以日頭都係好少放佢落去!!! 每晚都會係床仔瞓頭嗰幾個鐘頭, 直至佢係咁醒要食mama milk, 就過大床食住瞓!!!

(3)攞玩具玩好叻!!! 會兩隻手玩同一樣玩具!!! 又會兩隻手分別玩兩樣玩具!!! 開始鐘意玩d唔玩得嘅野: 例如: 搖控, 手提, 開櫃桐...... 呢兩個鐵盒都唔係佢嘅玩具!!! 所以佢特別有興趣!!! 哈哈!!! (小瑜ma, 我會比個你咖喇!!)

(4)會執番d跌開左嘅玩具or佢想玩嘅野!!! 好多時都會執到成個爬左係度!!! 好有毅力, 唔會放棄, 會執到執到為止!!!!! (一d都唔似mami, 哈哈!!!) 真係唔成功會大叫, 等大人幫佢手!!!

(5)唔鐘意爬係度, 一發現自己爬左係度就會大喊大叫,  抱佢坐好佢又會繼續玩!!! 而家我地會示範爬來爬去比佢睇, 佢會爬係度睇住我地笑一陣!!! 然後又大叫我地救佢起身!!! 哈哈~~~ 

(6) 食粥仔叻左好多~~~ 我覺得你因為我同嫲嫲都煲得叻左!!! 啱佢口味!!! 又杰又好味, 食到佢好似食糊仔咁追住食,  食一大碗都係大約15分鐘左右, 餵得我地好開心~~~

已經食過南瓜肉粥, 節瓜肉粥同蕃薯肉粥!!! 就咁剩肉粥就麻麻地~~~ 中醫師話用田雞煲比bb好喎~~~ 可能又試下!!! 而且應該就快可以試魚粥喇!!! 呢d咁高難度, 要等嫲嫲無先得!!

(7) 糊仔食少左好多lu!!!  而我試過比西lan花佢佢就唔多like喇!!! 到底粥仔定糊仔有營養d呢???

(8)零食方面呢!! 仔仔就好鐘意食米餅!! 一見到就好興奮!!! 自己放入口食得好叻好滋味咖~~~

不過食到好細塊就唔識放入口喇!! 會用手揸到好實食唔到!!! 咁我就會幫佢攞出黎餵埋比佢!!!  

(9)而細細粒嗰d零食, 仔仔就未識自己食喎~~~

佢會一手攞左個盤仔去, 又會一手揸住d餅仔, 不過唔識放入口!!

(10)哈哈~~~ poopoo呢~~~ 就分別識得去嫲嫲屋企個痰罐仔, 同埋我地屋企個厠所板仔!!! 未係定時定侯去咖!!! 見到佢想poopoo咁樣就放佢落去!!! 都成功過唔少次喇!!!

(11)手仔動作呢~~ 呢期好似學左hihi~~~ 之前就識得如果你比隻手掌佢, 佢就比個five你!!  byebye手就少左整喎!! 哈哈~~~ 等我再觀察下先!!!

(12) 而仔仔豬一見到bb嘅指定動作~~~ 哈哈~~~ 就係攬攬同錫錫喇!!! 次次都好肉緊咖~~~

見到女仔錫錫~~~

見到男仔又錫錫~~~ 哈哈~~~

而最常錫嘅~~~ 當然就係mami啦~~~ 哈哈~~~

(13)而家我地係房講"燈燈呢?" 仔仔豬識得望下床頭燈!! ^.^

(14)同埋好多野講, 最清楚就係扭mama milk時大叫"奶奶"!!! 同埋成日" da da da"咁講野, 哈~~ 我無話打佢呀!! 佢個意思好似係有d野想要, 叫我地比佢咁咖~~~ "da da da"咁把聲好得意, 哈哈!!

仲有好多野都想寫添~~~ 不過而家又醒唔起喎~~~

(15)最後再寫下呢隻豬仔夜晚嘅瞓覺情況先~~~ 每晚都係一冲完涼, 佢就會一上水就喊, 一路著衫, 一路扭mama milk, 一著好衫比佢食milkmilk就會開始瞓!!! 瞓左我就放佢落bb床!!!

然後呢, 大約2點幾, 4點幾佢就會合埋眼咁喊, 一抱起佢佢就會搵milkmilk, 一比佢食呢, 佢就會食到即刻瞓番喇!!!

我多數2點幾嗰次會放番佢落bb床, 不過佢再喊時我又勁眼瞓, 就抱佢過大床, 比佢食時我又瞓番, 然後多數半夢半醒佢又會食我幾次!!! 我瞓平左, 聽到佢喊又瞓返側比佢食下milkmilk, 佢又瞓左, 甩左咀, 我又瞓平.....  

其實都唔知道佢食左幾多次呢??? 我每日起身就覺得打側就住佢瞓d筋骨好攰囉!!!

好想同佢戒左呢個當我奶咀嘅習慣呢~~ 如果係肚仔餓, 我比你食當然ok啦~~~ 但係咁樣係咁搵食就唔係啦~~~ 試過好多款奶咀佢都唔要呢~~~ 小瑜ma送左個nuby仿人奶奶咀都唔得呢~~ 唉!

我唔介意繼續做奶媽, 不過唔想做奶咀呢~~~ 尋晚我試過佢醒左我唔比佢啜, 佢就係咁大喊大叫"奶奶", 我抱佢哄左佢好耐都先瞓得番呢!! 幾次之後我仲攰過比佢啜住瞓, 今日好似打完仗咁呢!!!

唉!! 希望仔仔豬而家大個左d, 會明白我嘅意思啦~~~ 天光先起身搵mami, 我就比你食milk milk啦~~~ 半夜醒一醒你繼續瞓得咖喇!! 仔~~~ 乖乖~~~

8個月大快樂呀~~~ 仔~~ 希望我地一家人繼續日日開開心心, 健健康康, 同仔仔豬哨多d街街, 學多d野!!! ^.^