今日抽血....

今朝早同老公兩個一早set好鬧鐘起身打電話book醫生!

首先打左去葛量洪夫人健康院, book產前檢查，最快下星期五17/11朝早9點！ok！

跟住打去荃灣一個好多mummy話好嘅私家婦科, 嘩!!最快11/12先有得睇！真係好爆喎....一個月後....!! book住先啦！

然後打去阿wing話佢老婆係法國生時護士話好好手勢的另一個黃醫生！咦！好啲喎！下星期四啱啱有個位喎！唔知係咪有人cancel左呢？所以16/11下午12:20去睇佢！

跟住諗不如問下政府醫院係咪真係去健康院便ok啦！尋晚我同老公仲研究緊去排边間政府醫院好:

(1)瑪嘉烈 -好近好方便可以一程van仔去到，但個婦產科無乜網上mummy提過

(2)廣華 -forum個個都話廣華好！九龍區婦科最good！但勁多人！ 排到傻.......

(3)QE - 呢間就有公務員特權！如果有房可以UPGRADE去二等房！但無就要喺超大房！婦科都幾好！仲有特別輔導喂母乳嘅nurses! 睇香港嘅外國人英文forum就話好好!!  

因為好難決擇！諗到煩！睇forum又睇到癲！所以決定抽簽！抽到QE！

所以今朝電QE啦！請問最快排到幾時可以做產前檢查呀？「Oh!!最快都排到３月喇！」吓！咁誇張........

咁我可唔可以去健康院先3月先去醫院呀？？「去健康院keep住檢查先都得！um... 但係你驗左血未？」

未呀！！！「咁...... 你今日有無時間嚟姑娘同你抽血先吖？」

今日？？ ok啦...「咁... 下畫３、４點見啦！唔好咁早呀！好多人！黎到同你約埋下次見醫生啦！」

所以....... 今日下晝就突然會進行我嘅第１次產檢了！希望好容易好輕鬆好順利！姑娘抽血好手勢啦！