第１次煲粥

今日下晝６點幾老公啲麻醉藥效過左之後，開始好痛，仲好似有啲燒，食左２粒止痛退燒藥便瞓左！好彩瞓得著！擔心同心痛！陰公......

之後就落街市買皮蛋同瘦肉回來，夜晚煲粥，我從來都唔鈡意食粥的，但都好努力煲，結果都唔錯！跟住要灘凍先可以食，食完已經１Ｏ點幾１１點了！老公又再食藥瞓左！

我係床睇書睇到１點幾，再出來打左陣機，跟住入房又係眼光光，ＴＭ完，玫瑰經完再affirmation埋都係瞓唔到！係咪太擔心？仲亂咁諗野，左諗右諗......，救命！！！

陰公....

老公左邊兩隻智慧齒已經byebye左了!! 有4日sick leave! 要好好抖下!!

我就努力研究緊有什麼可以煮比佢食, 粥同湯啦!! 仲有幾杯雪糕等緊你食!!

Happy Halloween to all!!

剝智慧齒 .

老公明天要剝２隻智慧齒，今晚要去食餐好啲嘅！

好似好得人驚咁, 但係都無法啦!! 希望順順利利, 舒服d快d攪掂, 休養完無事啦!!

好多剝過大牙嘅人都講到好痛好恐怖咁, 老公愈聽愈擔心...!

我就好好彩, 16歲已經出好晒4隻智慧齒了, 仲一家人整整齊齊, 除左迫到上下門牙左右嗰4隻牙仔縮左入去之外, 啲大牙都好乖, 所以唔洗剝大牙!!

老公就4隻智慧齒都唔乖所以就明天剝2隻, 下次再剝2隻了..... 其實係咪一次過剝晒, 驚一次好過驚兩次呢??

總之都係希望順順利利, 舒服d, 快d攪掂晒, 放假在家休養完, 好快就無事啦!!

扭親 .

前晚玩玩吓背脊右邊好似扭親咁突然好痛！所以尋日去左睇跌打！出左旺角睇黎師傅，老公睇開嗰個，佢話我應該係肌肉疲勞，背脊係膜嚟喎？而家扭埋一齊所以痛，於是幫我按番鬆佢，好勁力度，但好神奇咁真係按左十幾廿分鐘就好番好多了！而家瞓醒又再好啲！但上半身轉向右仲係痛，希望快啲好番啦！

昨晚紅酒+海鮮+大富翁+鋤大dee盛況!!

maggie 攞左2枝紅酒上來 4個靚女等老公大厨煮海鮮比我地食

有凍蟹, 蒸扇貝. 薑蔥蠔同清酒蜆!!!

真錢大富翁我做左大富翁, hehe...

最後, denis都上左黎玩鋤大dee, cyanyan要返工, janet要湊bearbear, 兩個走先了!! maggie話唔識玩但係d牌好邪, 贏晒
 

今晚紅酒海鮮+真錢大富翁^.^

今晚9點Maggie, Cyanyan同叻叻會上黎！Maggie話有幾支紅酒想攞黎飲！咁我地兩公婆就去左楊屋道街市買海鮮喇！好抵呢個街市！

仲打算玩威威創嘅真錢大富翁！好好笑！首先每人攞150蚊本錢！先比50蚊銀行！然後玩嗰時所有金額除以100！例如旺角買地係$2800, 咁即係要比$28銀行！企中人地塊地要罰$140，咁即係要比$1.4人地了！經過起點可以攞$2000，即係真正攞到$20！如此玩落去，無錢就要抵押番啲地出黎比銀行，唔准問人借！最後破產嘅就輸了！銀行剩番嘅錢大家分番！最多都係輸一百蚊度！但因為係真錢，所以罰十蚊都好肉緊，好好笑！玩完食飽再post啲相上黎啦

代課? Part time trainer?

眨吓眼又10月尾了，真係開心嘅日子過得好快！不過其實返工時日子仲過得快(起身-返工-忙-放工-攰死-瞓)，不斷遁環！而家係每日都好充實好lumlum咁過自己嘅日子！正

前日打返電話比舊校校長，因為仲未收到封服務證明信！原來寄錯左地址，仲寄左返西環，跟住同校長傾左幾個字电話，哈哈，好似朋友咁吹下水講下近況咁，幾lum，我辭職畤佢挽留我時我話我唔係去第二間學校教, 只係想抖下同試吓其他形式嘅工，鐘意小朋友未必一定要限教書啫，襯仲未有負檐時試下先！我真係無呃你！佢問咁我而家做緊乜? 我話無做野抖緊, 同準備緊一啲special needs learning center嘅野，在research階段中，跟住佢就問我代唔代課了！我話都好吖！可以見下我舊年啲學生仔同同事都好lumlum吖！跟住佢話11月至12月有5星期代課位！吓！我諗住3日病假嗰啲咋！佢話OKOK！如果有就找我！hehe...我仲好離譜咁要求早一日通知，因為我怕我朝早聽唔到电話响，係咪好老實呢？hehe...

然後尋日又收到一個賺外快email, 唔係junk mail嗰啲，係一間IT in Education公司嘅老細，以前在學校教書兼做IT野畤合作過，而家公司唔係好夠人手，但又好多學校等做training，有無興趣做Part Time trainer 或者Temp Full Time ？同老公傾過，去學校教老師都幾好玩，但應承了11月尾同老爺奶奶旅行，同想時間flexible啲，所以選擇左以job base計的part time！下星期一去傾下details先！

雖然放假好嘆好舒服，但都開始想揾d野做下了，加油

 

天使之戀 ^.^

 今日老公返中, 我叫佢出門口前叫醒我, 點解呀?? 因為想打機!! 懶瞓豬都唔瞓了!!

打緊呢個, 以前好少玩online game!! 因為要用好多時間煲!! 而家放假玩下都好lumlum!! 有時間download同我一齊玩啦!! free of charge!!

官方網站 :

http://al.gameflier.com/

 

2006.10.24 今晚一品鍋 ^.^

今晚原本打算買少少菜同丸丸同老公玩一品鍋!! 點知傾傾下又有兩位貴賓賞面上左黎一齊食!! ^.^! lumlum!!   有一鑊熟嘅雜丸加粉絲娃娃菜，加醉雞亦同老爺牌炒粒粒！撈飯一流！

貴賓一號maggie同貴賓二號c yanyan!! 兩位住得好近嘅街坊!!

老公成9點幾先返到黎, d 丸丸都漲晒了!!

最後大家都食唔晒, 飽到傻左！好彩有你地幫手食咋！thanks!!